- 30 نيسان 2020
- أقلام مقدسية
بقلم : سعيد الغزالي
تقف الصحفية عزيزة مراسلة تلفزيون المعزوزة امام بناية رئاسة الوزراء، في مدينة زيوناز، برفقة عدد من المراسلين الصحفيين. بعد لحظات يصل لحوم، وتتبعه معالي وزيرة الصحة. امرأة مليانة ومهيبة، وكلامها مختصر ومفيد، يمسك لحوم الميكروفون، ويبدأ بفحص الصوت. يضع الاعلاميون أجهزة التسجيل امامه، الكاميرات منصوبة على بعد عدة مترات. الكل صار جاهز.
استدارت عزيزة إلى الوراء وقالت مخاطبة الاعلاميين وهي تضحك:
- وصل لحوم، استعدوا، افتح يا سمسم.... قصدي افتح التلفزيون
يستهجن لحوم قولها، ويقول:
-شو بتحكي يا عزيزة شو هادا افتح يا سمسم. ديري بالك.. احنا مش كاراكوز.
- انا بمزح يا لحومتي، بعدين الكاراكوز حلو برمضان، بكفي الكورونا دبحتنا، خلينا نخفف عا حالنا، ونمزح مع الحكومة، والحكومة على راسنا. يا حكومة ... لما انقتل عمي عملتي ايه... يا حكومة. يا خسارتك يا عمي، يا زيين الشباب والله كنت رجال، رحت هيك بشربة ميه.
- الله يرحمه عمك، عمك شهيد.. بس بلاش مواويل حزينة، مرة بتضحكي وبلحظة بتصيري تولولي..
يبدأ لحوم حديثه مخاطبا الإعلاميين، ويقول:
-اليوم يا جماعة عندنا برنامج الايجاز الصحفي اليومي، زي ما عودناكم، كل يوم، راح يشارك بالإضافة لمعالي وزيرة الصحة معالي رئيس الوزرا بعد قليل..
تسود همهمات استهجان بين الإعلاميين. يستأنف لحوم حديثه:
- أكيد معاليه راح يحضر الايجاز، ما تخافوش راح يجاوب على كل اسئلتكو. يلا استعدوا يا جماعة، استعدي يا عزيزة. بكفي حزن وبكا، الله يرحمه عمك، بدنا وقفة عز. مسحت عزيزة دموعها، واستعادت مرحها الساخر، وقالت:
-يعني كيف بدك إياني أستعد يا لحومتي؟
-اسمعي يا عزيزة: زبطي الكمامة على وجهك ، وشدي جسمك منشان تطولي شوية، وارفع راسك للسما السابعة واشمخي. وبلاش تعطسي. وتصيبنا بالكورونا. احنا بدنا وقفة عز. يا الله يا اعلاميين، احنا فخورين بكم، بدنا وقفة عز... يلا
انضبطوا انضبطوا... وقفة عز.
-كيف ننضبط؟ صاح أحد الإعلاميين.
أجاب لحوم:
-الانضباط يعني بتشدوا حالكو، ترفعوا روسكو وتشمخوا للسما السابعة.
-انا مش فاهمة يا لحومتي شو ضرورة وقفة العز. كل يوم بتحكي وقفة عز، وقفة عز، وين هادا العز اللي بتحكي عليه، وكل يوم عنا شهيد ولا تنين. هادا غير الكورونا.
-مش فاهمة يا ملطوشة، ما انت طول عمرك خياره. وقفة عز. يعني وقفة الشرف. احنا شعب الجبارين، واليوم احنا في حرب ضد الكورونا وبدنا وقفة عز. خلينا ننتصر على الكورونا والاحتلال.
- الله يكسر بخاطرة، ها الكورونا، زي ما كسر بخاطرنا وحبسنا في بيوتنا. يعني كيف بدنا نتحمل كورونا واحتلال.. والله صعبة يا جماعة.
تمتثل عزيزة للأوامر وتشد جسدها وترفع راسها وتشمخ.
-أيوة هيك وقفة العز يا عزيزة، بس زبطي الكمامة.
-طيب وقف انت وقفة عز يا لحومتي، هو بس احنا نوقف وقفة عز.
-معاك حق. ضرب لحوم الأرض بكعب كندرته وشد جسمه ورفع راسه للسما العالية، وها احنا وقفنا وقفة عز. بس قبل ما نبدا الايجاز الصحفي، يا الله نغني لوقفة العز..
-ما بنفع الايجاز بدون وقفة العز ولا وقفة العز بدون الغنا.
-انت مشاكسة يا عزيزة... مش عاجبك العجب. طبعا احنا لازم نوقف وقفة عز، ونغني وندبك، تخيلي يا عزيزة انو الرئيس ما أصدر تعليماته علشان الكورونا في الوقت المناسب، شو بدو يصير فينا، الرئيس حريص على أرواحنا، مش عارفه انو احنا هزمنا الكورونا، شوفي الدول التانية شو صار... شوفي إيطاليا واسبانيا شوفي اميركا، لازم نوقف وقفة العز، ما بتشعري بالعز، يا عزيزة، ليش زملاءك هيهم وقفوا وقفة عز بكل احترام.. يلا يا جماعة افرحو وغنوا. الجميع راح يشارك. خلي كل العالم يشوفنا، احنا عا الهوا في بث حي ومباشر. يلا يا عزيزة. أمسك بيدها وبدأ يرقص ويغني، وشارك الجميع في الغناء والدبكة.
هب هب، هن دب دب ، طن،هب دب هن هب طب طن هب كب هن. يلا اضرب.. كمان يا أبوفراس... اضرب .. أحسنت يا عزيزة... بس اصحي تتفركشي لابسة كعب عالي وجاي عا .. يلا يا أبطال هب هب هن... اضرب، معلش كسروا الأرض، بدنا يشوف العالم وقفة عز هبهب هبهب..
تتوقف عزيزة عن الدبك وترجع لمكانها.
-والله ما انا فاهمه ولا كلمة يا لحوم من ها الاغنية. شو معنى الحكي يا لحوم، بتهبهب هب وتهن وتهن هن وتطن تطن طن.
-مش ضروري تفهمي يا عزيزة، المهم تزبطي الكمامة على وجهك، اربطيها منيح ورا ادنيك. وانتو يا أهلنا وربعنا خليكو بالبيت. يعطيكو العافية يا أبطالنا الصحفيين والصحفيات. هلا بنبدا الايجاز. معالي وزيرة الصحة راح تخبركم بآخر إصابات الكورونا.
تمسك وزيرة الصحة الميكروفون وتعلن: لدينا إصابتين فقط، خلال ٢٤ ساعة الماضية. الوضع مطمئن. بس ضروري تلتزموا بالتعليمات، احنا حريصين على سلامتكو وشكرا.
امسك لحوم الميكروفون، وقال بحماسة: بس إصابتين يا جماعة، كورونا تحت السيطرة، خليكو بالبيت، يدخل رئيس الوزرا.. يتحمس لحوم، ويهتف نشكر معالي رئيس الوزراء. هيو وصل، وأنا قررت أن اهدي معاليه كتاب. يعني في ناس بحبوا يتصيدوا في المية العكرة. وأنا مش زعلان من معاليه.
أمسك معالي رئيس الوزرا الميكروفون.. وشكر سيادة الرئيس وتحدث عن إنجازات الحكومة. وقال: اسمعوا يا جماعة... صار عنا عجز في الميزانية، عجز كبير، وبدنا تشدوا الهمة وتتبرعوا للمحتاجين والفقرا، واحنا حطينا ارقام حسابات في البنوك... بإمكانكم تدفعوا وتتبرعوا... وكمان قررنا خصم يومين من رواتب موظفي الدولة، يعني أي موظف بدو يعترض على الخصم، بإمكانه يعترض، ويرسل رساله... الخصم مش اجباري. وشكرا.. يستدير معالي الوزير ويختفي بسرعة في مبنى رئاسة الوزرا.
-بس انا مش فاهمة يا لحوم. عندي سؤال محرج لمعاليه كنت بدي أسألو
-معاليه مشغول كتير. اسألي زي ما بدك، احنا بلد ديمقراطي، وحكومتنا شفافة، انت بتعرفي شو معنى شفافة يا عزيزة؟
- شفافة يعني بتشف...
- لا شو ها الحكي، الحكومة ما بتشف، شفافة يعني ما منخبي أي شي على الشعب.
- شو بتقصد يا لحومتي يعني شالحين كل اشي زلط ملط، والله انت بتجنن وانت هيك كيف لو ....
- قلة أدب ما بدي أسمع... يا عزيزة أسألي سؤالك.. وخلصينا.
-طالما انتو بلد ديمقراطي وحكومتكو شفافة، وما بتشف، يعني إذا بسأل مش راح يصير معاي هيك ولا هيك.
- احنا نتقبل أي نقد بصدر رحب. أنتو أهلنا وأحبابنا.. شوب تقصدي يا عزيزة، هيك ولا هيك.
بدأت عزيزة تولول
- يا خيبتك يا عزيزة يا خيبتك. والله راح تروحي لبيت خالتك.
- اسمعي يا عزيزة.... فش عنا لا بيت خالة ولا عمة، الكل بطس فينا، والاحتلال بيضربنا، حتى انت يا عزيزة جايه علينا.
استعادت عزيزة رباطة جأشها، وقالت: لا تؤاخذني يا لحومتي.. والله زهقنا من القعدة بالبيت.
-اصبري يا عزيزة... علشان هيك احنا بنعمل الايجاز كل يوم، حتى يشوفنا العالم. يلا اسألي سؤالك. بس ما تغيري وقفتك، خليك واقفة وقفة عز. زبطي الكمامة، ارفعي راسك، انفخي صدرك، اشمخي... أيوه هيك يا عزيزة بدنا شموخك يصل للسما السابعة.
تعيد عزيزة شد قامتها القصيرة وترفع راسها، وتقول: هيني شمخت يا لحومتي، بقدر أسأل؟
-اسألي. انا هون منشان اجاوب على كل أسئلة الصحفيين. انتو بترفعو روسنا، والحكومة في خدمة الشعب.
-بما انك يا لحومتي بتشتغل ناطق باسم الحكومة اشرحنا لويش عملتوا قوانين لزيادة رواتب الوزراء وكبار المسئولين، مش بدكوا ايانا نتبرع للفقرا، طيب اجلو الزيادة لبعد الكورونا، وتبرعوا بالزيادة للمحتاجين.
-سؤالك منيح. أنا بشكرك على السؤال المهم، الحكومة لسة ما اخذت قرار، الحكومة بتدرس القرار.. وهناك فرق بين اتخاذ القرار، ودراسة القرار، وانا ما بقدر اعلق على قرار لسة الرئيس ما وافق عليه.. وإن شاء الله ما راح يصدر، انا بوعدك انو راح اطلب من الحكومة تأجل القرار.
-إذا صدر قرار يا لحومتي شو بدك تعمل؟
-شد حيلك يا عزيزة وخليك واقفة وقفة عز. سألت كتير أسئلة، أعط الفرصة لغيرك.
وانتو يا صحفيين بنحييكوا على جهودكو، بدنا اياكو تنقلوا رسالة عز للعالم. انتهي الايجاز، اللقاء غدا، إن شاء الله، في نفس الموعد. وخليكوا بالبيت.
